SIMANGALISO NTSHANGASE
OWAYEYINJINI yezinkunzi zase-Italy, iJuventus u-Andre Pirlo usemenyezelwe njengomqeqeshi omusha waleli qembu elisanda kunqoba isicoco seSerie A, kodwa lehluleka lancama ukuqhubekela phambili emqhudelwaneni we-UEFA Champions League.
UPirlo (41) owayeyibamba kuthule umoya enkabeni yenkundla kwiJuventus eminyakeni emihlanu edlule uzovala isikhala sikaMaurizio Sarri (61), okhonjwe indlela kuthangi kuleli qembu ngemuva kokukhishwa kabuhlungu iMachester City emidlalweni weLast 16 kwi-UEFA Champions League.
UPirlo yize engenawo amava atheni kwezokuqeqesha kodwa useke wayibamba kafushane ku-Under 23 weJuventus, njengoba manje esezoqeqesha iqembu elikhulu kulo asayine inkontileka yeminyaka emibili.
IJuventus iphawula esitatimendeni esikhiphe izolo ngokuqasha uPirlo ithe:
“Lesi sinqumo esisithathile sincike okholweni esinalo ngo-Andre Pirlo esikholwa ukuthi unakho okudingekayo, ukuze ahole leli qembu esebenzisa lesi sikwati esinaso nesigabe ngabadlali abanethalente elimangalisayo.”
USarri osekhonjwe indlela uthathe izintambo kwiJuventus esuka kwiChelsea ekuqaleni kwesizini esisongiwe, nokho wehluleka ukwenza nokufeza yonke imibandela ababekelwe yona kule kilabhu, okuyisona sizathu leso esenze ukuba ijazi ligcwale umoya kuyena esahlale isizini eyodwa nje vo kwiThe Black and Whites.
Nokho uPirlo akasiye umqeqeshi wokuqala ukunikwa izicathulo ezinkulu kangaka engenamava kwezokuqeqesha, kwazise ulandela ezinyathelweni zikaZinedine Zidane (Real Madrid), Frank Lampard (Chelsea), Gennaro Gattuso (Napoli) noMikel Arteta (Arsenal) ukubala nje abambalwa.
KwiJuventus uPirlo uzoqeqesha uGianluigi Buffon (42), Giorgio Chiellini (35) noLeonardo Bonucci (33) okungabadlali adlale nabo isikhathi eside kwiJuve naseqenjini lesizwe lase-Italy eminyakeni edlule. Uzophinde acije izikhakha ezifana noChristiano Ronaldo, Paulo Dybala, Gonzalo Higuan noBlaise Matuidi ukubala nje abambalwa.